Karl Th. Birgisson staðinn að verki

Það er auðvitað rétt, sem Ólafur Jóhannesson forsætisráðherra sagði eitt sinn, að ekki ætti að eyða fallbyssuskotum á þúfutittlinga. En ég gat þó ekki orða bundist, þegar ég las eftirfarandi á bloggi Karls Th. Birgissonar, fyrrverandi ritstjóra Pressunnar og fyrrverandi framkvæmdastjóra Samfylkingarinnar:

Hannes Hólmsteinn hefur lýst því í fleiri en einu samtali að þessi hópur (eða hluti hans) hafi staðið að og greitt fyrir könnunina sem nú verður (að öllum líkindum) til þess að Bjarni Benediktsson hættir sem formaður Sjálfstæðisflokksins. Kannske er þetta bara karlagrobb í Hannesi, kannske gerði kosningastjóri Hönnu Birnu á Viðskiptablaðinu könnunina upp á sitt eindæmi.

Ég hef ekki átt nein slík samtöl. Og það, sem meira er: Ég hefði ekki getað átt nein slík samtöl, því að ég fór utan 21. mars og kom ekki heim fyrr en 22. apríl. Það er síður en svo neitt leyndarmál, hvar ég var, því að ég hef verið að sækja málstofu um almannavalsfræði og ráðstefnu um einkaframtak í Brasilíu, sem margt má lesa um á Netinu.

Ég var önnum kafinn hér úti og talaði ekki einu sinni í síma við vini mína heima á Íslandi, hvað þá einhverja menn, sem umgangast Karl Th. Birgisson. Ég hafði ekki hugmynd um þessa könnun, sem Viðskiptablaðið lét gera, fyrr en ég las um hana á Netinu úti (en ég var raunar ekki alltaf í netsambandi á ferðalögum mínum). Þegar Karl Th. Birgisson vitnar drýgindalega í „fleira en eitt samtal“ við mig, er hann að segja ósatt, ekki aðeins að spinna, eins og hann gerir á hverjum degi fyrir Samfylkinguna, heldur beinlínis að spinna upp. Hvað gengur honum til?